Monday, November 22, 2010

Art Na May Taste Kuno


Katukin mo man nang katukin ang konting kontak mo
sa mga kritikong bulag sa kalamnan ng kinaiinisang
kalaboso, malamig pa rin ang himig nitong tula mong
musmos pa sa tumatanda nang sigaw ng mga siglo ko.

Ikaw si makatang makatao, sila si estetikong hari
ng style at smiles sa aisle ng Cultural Center niyo.
Ako, sino ba akong wasted na nagmamasid sa kultura
ninyong bumaon na sa lalamunang kumontak sa Taste?

Haste makes waste, ika nga, at late na ang lahat
para maayos pa ang puno ng duhat sa hardin ng rosas.
Hala, ipagpatuloy niyo yan at baka umulan, buwanan
pa naman kung kumita ng stipend sa binuwayang buwis.

Huwes daw akong inggit laang. Sabi ko naman, abugado
sila sa mga krimen ng nakasanayang kawalang-saysay
na sumasayaw sa entabladong di pinapanood ng tao
kundi ng mga matatalinong gago sipping wine sa likod

ng pinto na kung kakatukin mo, walang lilingon sayo.
Ganti lang siguro sa ating di sumipsip sa soprano.

No comments:

Post a Comment